အိုးဝေ (အစမ်း): ချည်ထည်မြို့တော်

Akihabara (အကိဟဘရ)ကို လျှပ်စစ်မြို့တော်လို့ သတ်မှတ်သလို Nippori ကိုလည်း ချည်ထည်မြို့တော်လို့ ခေါ်နိုင်ပါတယ်။ ချည်ထည်မြို့တော်လို့ တင်စားရလောက်အောင် အထည်အလိပ်ဆိုင်တွေလည်း ပေါများပါတယ်။ ချည်ထည်၊ ပိုးထည်တွေ အသားကောင်းသလို အဆင်တွေလည်း လှတယ်။ မြန်မာပြည်ကနေ အလည်လာတဲ့အခါ ဒါမှမဟုတ် မြန်မာပြည်ကို လက်ဆောင်ပေးချင်တဲ့အခါ မဖြစ်မနေသွားဖြစ်တဲ့နေရာလေးပါ။

ခဏလာကြတဲ့ သူငယ်ချင်းမိတ်ဆွေတွေကို လိုက်ပို့ရတာလည်း Nippori ကိုပါပဲ။ အဲဒီဘူတာက Ueno, Akihabara တို့နဲ့ လမ်းသင့်တာကြောင့် Yamanote line စီးရင်လည်း အဆင်ပြေပါတယ်။ South Exit ကိုထွက်လိုက်ပြီး ညာဖက်လှေကားလေးအတိုင်း လိုက်သွား၊ နောက် တည့်တည့်ဆက်သွားမယ်ဆိုရင် လမ်းတလျှောက်မှာ အထည်ဆိုင်တွေ တွေ့နိုင်ပါတယ်။ လမ်းသုံးပြလောက်လျှောက်ပြီးရင်တော့ မြန်မာတွေ အ၀ယ်များတဲ့ ကီမိုနိုဆိုင်ကို လမ်းဗယ်ဘက်ခြမ်းမှာ မြင်ရမှာပါ။ သွားဖြစ်တဲ့အခါတိုင်း လာဝယ်တဲ့မြန်မာတွေ တွေ့ရတတ်ပါတယ်။ တချို့ဆိုင်တွေက အလိပ်လိုက်ထောင်ထားတာတွေရှိတော့ ကိုယ်လိုချင်တဲ့ မီတာအတိုင်း ဝယ်လို့ရပါတယ်။ မြန်မာတွေ အဝယ်များတဲ့ဆိုင်လို့ပြောတာက အမျိုးသမီးတွေ ဝတ်လေ့ရှိတဲ့ မြန်မာလုံချည်ကွင်းအတိုင်း ဖြတ်ထားပြီးသားတွေ ရောင်းနေလို့ပါ။ (၂) မီတာဖြတ်၊ (၁.၈)မီတာဖြတ်ဆိုပြီး ရွေးဝယ်လို့ရသလို ဒီဇိုင်းဆန်းတာ၊ အသားကောင်းတာရယ် လိုက်ပြီးတော့လည်း ရွေးဝယ်နိုင်ပါတယ်။ ဈေးလည်း အမျိုးမျိုးကြည့်ဝယ်လို့ ကောင်းတယ်။

မသွားခင်ကတော့ အများကြီး မ၀ယ်တော့ဘူးလို့ စိတ်ကူးထားပေမယ့် ပြန်လာရင် မနိုင်မနင်း သယ်ပြန်ရတာချည်းပါ။ အဆင်တွေကလှ၊ ဟိုဟာလေးလိုချင်၊ ဒီဟာလေးလည်း လက်ကမချချင်နဲ့ လုံချည်စတွေပေါ်မှာ လက်နှစ်ဖက်လုံး ရှုပ်ရှက်ခတ်နေပါတော့တယ်။ အကျီင်္စလေးတွေကလည်း လှရှာတယ်ဆိုတာထက် အသားကောင်းတာပါ။ ချည်သားစစ်စစ်တွေဆိုတော့ အမေကတော့ လူကြီးဖြစ်လို့ အေးအေးလေးတွေ ဝတ်ရတာကြိုက်သတဲ့။ ချည်သားပါတိတ်တွေကလည်း အသားကောင်းတယ်။ ကီမိုနိုဆိုင်ကပြန်လာရင် မြန်မာပြည်ပြန်ချင်စိတ်တွေ ကြီးစိုးနေတော့တာပါ။ မြန်မာလုံချည်လေးဝတ်ချင်လို့။ အိမ်ရောက်ပြန်ရင် လက်ဆောင်ပေးဖို့ လူပုံစံနဲ့ လိုက်မယ်ထင်တဲ့အဆင်တွေ ခွဲခြားတဲ့အခါ အတော်ဒုက္ခရောက်ပါတယ်။ “ဒါလေးက သိမ်းထားပေး ပြန်လာရင် ဝတ်မယ်၊” “အယ် ဒီအဆင်လေးက ကြိုက်တယ် အပြန်ကျ ဝတ်မှာနော်”၊ “ဒါကတော့ အသားလေးက အိနေတာ ငါယူမယ်” ဆိုပြီး ဖယ်ထားလိုက်တာ နောက်ဆုံး လက်ဆောင်မပေးချင် ဖြစ်ရတော့တယ်။ နောက်တော့လည်း ပြန်ရွေးပြီး မျက်နှာလေးအသာလွှဲ လက်ဆောင်ပို့ပေးလိုက်ရတော့တာပါ။

စိတ်ဝင်စားလို့ သွားဝယ်ချင်တဲ့သူတွေ ဖတ်မိစေချင်တာရော အပျင်းပြေ ဓါတ်ပုံလေးတွေကြည့်စေချင်တာရောနဲ့ ဒီပို့စ်လေး တင်လိုက်ပါတယ်။