အိုးဝေ (အစမ်း): အာလူးထမင်းနယ်

အဆောင်မှာ သူငယ်ချင်းတွေ မွေးနေ့ ဒါမှမဟုတ် ညဖက်ပျင်းတဲ့အခါ လုပ်စားဖြစ်တာက အာလူးထမင်းနယ်၊ ငါးထမင်းနယ်။ အခုလုပ်စားဖြစ်တာက အာလူးထမင်းနယ်ပါ။ လုပ်ရတာ အလွန်လွယ်ကူပါတယ်။ စားရတာလည်း ကောင်းပါတယ်။

အာလူးကို ပြုတ်၊ အအေးခံထားလိုက်၊ ထမင်းကိုလည်း နည်းနည်းအေးအောင် အိုးအဖုံးဖွင့်ထားတယ်။ ကြက်သွန်ဖြူဆီချက်ရယ် ထမင်းရယ် အာလူးရယ်ကို ဇလုံခပ်ကြီးကြီးမှာ ထည့်နယ်ရပါတယ်။ အာလူးကလည်း စီး၊ ဆန်ကလည်းစီးတော့ သေချာနယ်ရတာ လက်ဖနောင့်တောင် နာတယ်။ အာလူးနဲ့ထမင်း တသားထဲဖြစ်မှာ စီးစီးလေး စားကောင်းတာဆိုတော့ အနာခံရတာပေါ့နော်။ အဆောင်မှာတော့ ရခိုင်ဘင်္ဘောသီးသုပ်စားရင် နယ်တဲ့ ဇလုံအကြီးကြီးနဲ့ နယ်ရတာ။ သူငယ်ချင်းတွေများရင် ထမင်းဆုပ်ကို တယောက် ၂ ဆုပ် လောက်ပဲ ဝေစုရတော့ ဘယ်ထမင်းဆုပ်က ပိုကြီးသလဲ နယ်နေတုန်းကတည်းက ကြည့်ထားရတယ်။

"စားလို့ရပြီ"လို့ ပြောလာမယ့်အချိန်ကို ကိုယ်မှတ်ထားတဲ့ ထမင်းဆုပ်မပျောက်အောင် မျက်တောင်မခတ်တမ်း ကြည့်ထားရတာ။ အခုတော့ ဘယ်သူမှ လုမယ့်သူမရှိတော့ဘူး။ ဒါပေမယ့် စိတ်က ခပ်ကြီးကြီးထမင်းဆုပ်လေးကို အရင်ထည့်စားဖြစ်နေတယ်။ လူတွေအများကြီးဆို အဆုပ် ၃၀၊ ၄၀ လုပ်ရတာကိုး။ အာလူးထမင်းနယ်က ခပ်စီးစီးဆိုတော့ စားရတာ အီလွယ်တယ်။ ငရုပ်သီးလှော်၊ ပဲပုပ်ကြော်၊ ငါးသေးခြောက်ကြော်၊ ပူစီနံ၊ နံနံပင် လေးတွေ ထည့်စားပေါ့နော်။