မဇနိ၏ လက်ရာများ

မဇနိရဲ့ အစားအစာတွေကို ကျနော် ကိုဇနိက တင်ပေးလိုက်ပါတယ်။
ညီလေး မောင်မျိုးက ထိုးထည့် သိပ်ထည့် ပို့စ်ရေးတော့ သွားကြော်ငြာမိသေးတယ်။ ဒီနေ့ မဇနိက သူချက်စားတာတွေ တင်ဦးမှာလို့။ လာငေးစားလို့။ သူ့လို မလုပ်တတ်ပေမယ့် ဘယ်လိုပဲနေနေ ကိုယ့်ဗိုက်ကလေးတော့ ပြည့်အောင် ဖြည့်ရမှာ မဟုတ်လား။ တော်ကြာ အစားပုံမှန်မစားမလို့ ဗိုက်ဒုက္ခရောက်မှာ စိုးရတယ်လေ။ ကျနော်က ကြားထဲက လေဝင်ရှည်နေတာ မဇနိရဲ့ လက်ရာတွေကို မြည်းစမ်းစားကြည့်ပါဦး။


ကြာဆံကြော်


ဒီကနေ့ ရာသီဥတုက အေးတယ်။ ထမင်းမစားချင်ဘူး။ မနက်စာဘာလုပ်စားရမလဲ စိတ်ကူးလိုက်တော့ မစားရတာကြာနေတဲ့ ကြာဆံကြော်ဖို့ လုပ်လိုက်တယ်။
အချဉ်အတွက် ဂေါ်ဖီထုပ်ပါးပါးလှီး၊ ကြက်သွန်နီပါးပါးလှီး၊ ငရုပ်သီးစိမ်းလေးညှပ်ထားပြီး သံပုရာရည်နဲ့ လုပ်ထားလိုက်တယ်။
ကြာဆံကို နာရီဝက်လောက် ရေစိမ်ထားတယ်။
ပုဇွန်၊ ၀က်အူချောင်း၊ ကြက်သွန်ဖြူကို အဆင်သင့်လုပ်ထားလိုက်ပြီး ဆီဆူရင် ကြက်သွန်ဖြူဆီသတ်တယ်။
ပုဇွန်ကို နောက်မှထည့်ရင် ညှီမှာစိုးလို့ ဆီသတ်ကတည်းက ထည့်ပါတယ်။ အညှီဆို ကြောက်တတ်လို့ ဘာသားဖြစ်ဖြစ် အရင်ထည့်ကြော်ချင်နေတာပါ။ မန်ကျည်းမှည့်ကို ရေဖျော်ထားတယ်။ ကြိုက်တတ်ရင် မန်ကျည်းမှည့်ရည်လေးပါ ထည့်ကြော်ဖို့။ ဆီသတ်ထားတဲ့ထဲကို ကြာဆံထည့်၊ ငံပြာရည်၊ ငရုပ်သီးမှုန့်၊ မန်ကျည်းမှည့်ရည်လေးပါ ထည့်ပြီး ကြာကြာကြော်ပါတယ်။ ခြောက်ခြောက်လေးစားချင်လို့ပါ။ ပူစီနံရယ် အချဉ်ရယ်ပါ တွဲစားလိုက်ရင် မနက်စာတော့ အိုကေသွားတယ်။ ပူစီနံကလည်း ရွှေထက်ရှားတော့ ၀ယ်လို့ရတုန်းလေး အသုပ်လေးတွေပါ လုပ်စားရတာ။ တကယ်တော့ မြန်မာစာကို ကြိုက်တတ်တဲ့သူအတွက် ပိုက်ဆံပိုကုန်ပါတယ်။ အသားများများစားမယ်ဆိုရင် ဈေးဝယ်ရတာ အကုန်သက်သာမလား တွေးမိပေမယ့် ကိုယ့်အကြိုက်နဲ့ ကန့်လန့်ဖြစ်နေတော့ ဖြစ်သမျှအကြောင်း အကောင်းလို့ပဲ သဘောထားပြီး မသိချင်ယောင်ဆောင် နေရတော့တာ။

မုန့်ဖတ်သုပ်


ညပိုင်းဗိုက်ဆာလို့ သတ်သတ်လွတ်မုန့်ဟင်းခါးဖတ် သုတ်စားဖြစ်တာလည်း ပြောလိုက်အုံးမယ်။ မုန့်ဖတ်ကို ပြုတ်ပြီး ရေစစ်ထားလိုက်တယ်။ ကြက်သွန်ဖြူဆီချက်၊ ငံပြာရည်ချက်ထားတယ်။ မုန့်ဖတ်ရယ် ဆီချက်ရယ် ပဲမှုန့်ရယ်နဲ့ အသားမပါ သတ်သတ်လွတ် မုန့်ဖတ်သုပ်ပေါ့။ နံနံပင် ပူစီနံလည်း ထည့်သုပ်တော့ မွှေးရှာပါတယ်။

ကြက်သားသုပ်


တနေ့ကတော့ ကြက်သားသုပ်စားတယ်။ ပို့စ်မတင်ဖြစ်လို့ အခုတခါထဲ ပေါင်းတင်လိုက်ပါတယ်။ ကြက်သားသုပ်တာကတော့ လွယ်ပါတယ်။ ကြက်သားကြော်ကို အမွှာလေးတွေလုပ်ထားပြီး ခရမ်းချဉ်သီး၊ ဂေါ်ဖီ၊ နံနံပင်၊ ကြက်သွန်နီလေးနဲ့ သုပ်လိုက်တာပါ။ ငရုပ်ကောင်းကြိုက်တတ်ရင် ငရုပ်ကောင်းမှုန့်လေးထည့်မွှေလိုက်လည်း စားကောင်းပါတယ်။ အမြဲတမ်းမစားချင်ပေမယ့် တခါတလေတော့ ကြက်သားသုပ်လေးနဲ့ ထမင်းလေးစားရတာ မဆိုးပါဘူး။

မဇနိ